اعلامیه
د افغانستان د واخان د سیمې په شا او خوا کې د پاکستانیانو د شکمنو خوځښتونو په هکله، د بهرمیشتو افغانانو د نړېوالې شورا اعلامیه

په دې وروستیو کې رسنۍ داسې خبرونه خپروي چې ویل کېږي، پاکستان نیت لري چې د واخان په سیمه کې تاجکستان ته یوه لاره ورجوړه کړي. که څه هم چې دا خبر د افغانستان او پاکستان د رسمي چارواکو له خوا څخه تائید شوی نه دی خو د پاکستان (ژور ستراتېژیک) سیاست د افغانستان په هکله چې د منځنۍ اسیا بازارونو ته د ځان رسول او ګرمو اوبو ته د منځنۍ اسیا د نښلولو د پروژې څخه د افغانستان لرې کول، د پاکستان د کړنو د عملي کولو په هکله دا شکونه زیاتوي.
افغانستان د یوۀ خپلواکه هېواد په توګه د خپلې سیاسي خپلواکۍ، ځمکنۍ بشپړتیا او ملي ارزښتونو څخه د یوې پېړۍ په اوږدو کې ساتنه کړې او هېڅ هېواد ته اجازه نه ورکوي چې د افغانستان د ملي خپلواکۍ او ځمکنۍ بشپړتیا پر حق سترګې پټې کړي. د دغۀ امر څخه سرغړونه د بین الدول د حقونو د نه درناوي او د ښه ګاونډیتوب د اصولو تر پښو لاندې کول او روښانه تېری شمېرل کېږي.
تاریخ د دې شاهد دی چې د افغانستان خلکو هر ډول تیري ته غاښ ماتوونکی ځواب ورکړی دی. خلک دطالبانو امارت د چارواکو څخه په کلکه غوښتنه کوي چې دا مسئله روښانه کړي.
همدا ډول افغانان د نړېوالو ټولنو، په ځانګړې توګه د ملګرو ملتونو د سازمان د امنیت شورا څخه په کلکه غوښتنه کوي تر څو د پاکستاني چارواکو د شکمنو کړو وړو په هکله د پاکستان د حکومت څخه توضیحات وغواړي او په افغان خاوره کې دې د تېري کوونکو ګامونو په اخستلو، د پاکستان حکومت ته خبردارۍ ورکړي.

د بهرمیشتوافغانانو نړیوالي شورا
دمشرتابه بورد
ملبورن- اسټرالیا
د اګسټ ۳۰مه ۲۰۲۲کال